Paul  Lauterbur
(1929)

Peter Mansfield
(1933)

O Premio Nobel de Fisioloxía e Medicina de 2003 foi para dous científicos que traballaron no desenvolvemento das técnicas de resonancia magnética, un método de diagnóstico e investigación médica que permiten a visualización de órganos e detección de diferentes patoloxías.

Os dous premiados, Paul C Lauterbur (Estados Unidos) e Peter Mansfield (Reino Unido), traballaron na técnicas para aplicación médica da resonancia magnética. O primeiro Lauterbur descubriu como se pode formar imaxes en dúas dimensións das estructuras analizadas coa resonancia magnética e Mansfield desenvolveu a metodoloxía precisa para adecuar a técnica ós hospitais, producindo imaxes dunha interpretación doada.

^

Alexei  Abrikosov
(1928)

Vitaly L. Ginzburg
(1916)

Anthony J. Leggett
(1938)

O Premio Nobel de Física de 2003 foi para tres científicos que contribuíron decisivamente ó estudio de dous fenómenos da física cuántica: a superconductividade e a superfluidez. A superconductividade é a ausencia de resistencia eléctrica que presentan certas substancias cando están preto do cero absoluto, os 0 K. A temperatura á que aparece esta propiedade é propia para cada substancia.
Primeiro descubriuse no mercurio (1911) e agora coñécese que outros vinteseis elementos metálicos son superconductores, ademais doutros compostos e aliaxes. O fenómeno aproveitouse para facer bobinas que conduzan unha corrente eléctrica indefinidamente e crear potentes campos magnéticos en aceleradores de partículas.
A superfluidez é unha propiedade do helio líquido cando tamén está preto do cero absoluto. Concretamente, o isótopo ⁴He é superfluído a 2,171 K e o ³He é superfluído ós 0,00093 K. A esas temperaturas o helio pode fluír sen ningún tipo de fricción.
Existe unha conexión entre os dous fenómenos de maneira que unha substancia superconductora pode ser un superfluído con carga eléctrica.

Alexei A. Abrikosov desenvolveu a teoría da superconductividade e ofreceu unha explicación teórica sobre os superconductores de tipo II que permiten asemade a superconducción en campos magnéticos elevados.

Vitali Lazarevich Ginzburg puxo os alicerces para o traballo de  Abrikosov, traballando na explicación teórica dos superconductores de tipo I.  Ademais, traballou na propagación das ondas de radio e na orixe dos raios cósmicos.

Anthony Leggett é un especialista no eido da superfluidez.

^

Peter Agre
(1949)

Roderick MacKinnon
(1956)

O Premio Nobel de Química de 2003 outorgouse a dous investigadores estadounidenses, Peter Agre, da Universidade Johns Hopkins e Roderick MacKinnon do Instituto Médico Howard Hughes. Os méritos de ambos os dous científicos son os seus traballos sobre o paso de substancias a traveso da membrana plasmática. Peter Agre centra a súa actividade investigadora no paso de auga e proteínas. Agre descubriu canles nas membranas plasmáticas que permiten o paso desas substancias. Pola súa parte. MacKinnon é un especialista no estudio do paso de ións.

A circulación de auga e ións é básica para o mantemento da boa actividade celular e un axeitado equilibrio das presións intra e extracelular.

^